လမ်းပိုလျှောက်ရင် လျှောက်ရပါစေ
နောက်ကျရင်လဲ နောက်ကျပါစေ
အနာဂတ်အတွက်တော့ ဂုဏ်သိက္ခာကို ရောင်းမစားတော့ပါဘူး
Showing posts with label ကောက်ကြောင်း. Show all posts
Showing posts with label ကောက်ကြောင်း. Show all posts
Monday, January 7, 2008
မိုက်မဲသော
Posted by Color Blind at 11:20 AM 0 comments
Labels: ကောက်ကြောင်း
Monday, September 3, 2007
အမေ့အနားမှာ
မိုးတွေကလဲ မည်းလို့သည်းလို့ပါလားနော်...
မိုးတွေရွာနေရင် နှစ်ပေါင်းများစွာ သားသမီးတွေအတွက်
အမေနဲ့အတူ ပြေးလွှားခဲ့ရတဲ့ ကားငယ်လေး အအေးမိလို့
အမေများ ဒုက္ခရောက်နေမလား စိတ်ပူလိုက်တာ...
မိုးသည်းသည်းကြား စက်နိုးမလာတဲ့ ကားထဲမှာ တယောက်ထဲ အားငယ်နေရင်း
အမေ့ဘေးနား အတူရှိခဲ့ဖူးတဲ့ မနီးမဝေးက အဖေ့ကို တမ်းတနေမလား...
အမေ့ဘေးနား အတူရှိခဲ့ဖူးတဲ့ အဝေးက သမီးကို သတိရနေမလား...
အတွေးတွေက ဆောက်တည်ရာမရ...
ထိုဖူးနွေးတပွဲကို ဆယ်ခါစားချင်မှ တခါပဲ စားခဲ့ပါတယ်ဆိုတဲ့ အမေ...
မနက် ဝေလီဝေလင်းမှာ တောင်ပေါ်ရွာက ဆေးခန်းရှိရာ လေးမိုင်ခရီးကို
နေပူမိုးရွာမရှောင် ထီးထမ်းလို့ လမ်းလျှောက်တက်ခဲ့တဲ့ အဖေ...
ဘ၀လမ်းကြမ်းကို တွဲလက်ညီညီ ရင်ဆိုင်ခဲ့ကြတဲ့ အဖေနဲ့အမေ...
ရေဆန်မှာချော ရေစုန်မှာမျော လို့ မပြောရက်ပါဘူး...
တခြားသူတွေ ကိုယ်စီကိုယ်စီအတွက်တော့ ဘယ်လိုနေမယ် မသိပေမယ့်
အဖေနဲ့အမေအတွက်တော့ စိတ်ကူးအိပ်မက်ထဲက
နေပျော်တဲ့ နွေးထွေးတဲ့ အိမ်သစ်ကလေးတလုံးအတွက် အနှစ်နှစ်ဆယ်နီးပါး ကြာခဲ့ပါတယ်...
အမေကိုယ်တိုင် နေ့နေ့ညည အိပ်ရေးပျက်ခံ ဆွဲခဲ့တဲ့ အိမ်ပုံစံလေး
အုတ်မြစ်ကနေ ရုပ်လုံးပေါ်အချောသတ်နေတာကို နေ့တိုင်းရပ်စောင့်ကြည့်ရင်း
ပျော်ရွှင်ခြင်း မျှော်လင့်ခြင်းတွေက အတိုင်းအဆမဲ့ လွင့်ဝဲလို့...
ဒါတွေက အတိတ်တချိန်ကဆိုပေမယ့် လွယ်လွယ်မေ့ပစ်လိုက်စရာမှ မဟုတ်တာပဲနော်...
အဖေချခဲ့တဲ့ ဆုံးဖြတ်ချက်တခုအတွက် ၁၀တန်းဖြေခါနီး စိတ်ထိခိုက်ပြီး
စာမကျက်နိုင်ဖြစ်နေတဲ့ သမီးကို အတိုင်းအဆမဲ့နာကျင်နေလျက်က
"တနေ့ကျရင် အဖေ့ကြောင့် သမီး အမှတ်မကောင်းဘူး လို့
အဖေ အပြောမခံရအောင် ကြိုးစားလိုက်ပါ သမီးရယ်" လို့အားပေးတတ်ခဲ့တဲ့အမေ...
အမေ့ရဲ့ ခွင့်လွှတ်နိုင်ခြင်း အတိုင်းအဆကို နားမလည်တတ်ခဲ့ပေမယ့်
အဖေ့အတွက်ဆိုပြီး သမီး စာကျက်တတ်ခဲ့တယ် အဖေ...
မူကြိုကျောင်းကနေ ၁၀တန်းအောင်တဲ့အထိ
နောက်ဆုံးတက္ကသိုလ်ရောက်တဲ့အထိ မိုးရွာနေရင် မိုးကာခြုံပြီး
နေပူရင် ဦးထုပ်ဆောင်းပြီး တနေ့မပျက် ကျောင်းကြိုကျောင်းပို့လုပ်ပေးခဲ့တဲ့အဖေနဲ့အမေ...
သီတင်းကျွတ်ရောက်ရင် ဆေးခန်းအပြန်မှာ ရောင်စုံမီးပုံးလေးတွေ ၀ယ်လာပေးတတ်တဲ့အဖေနဲ့အမေ...
မွေးနေ့ရောက်ရင် သမီး အိပ်ယာမနိုးခင် လက်ဆောင်ထုပ်ကလေးတွေ
တိတ်တိတ်လေး လာချပေးတတ်တဲ့ အဖေနဲ့အမေ...
အဖေနဲ့အမေ...
အဖေနဲ့အမေ...
အဖေနဲ့အမေ...
အမေ့ရင်ထဲမှာ သမီးဖြည့်လို့လဲ မပြည့်နိုင်တဲ့ကွက်လပ်တခု ရှိနေတာ
သေသေချာချာသိလျက်နဲ့ လက်ပိုက်ကြည့်နေရတဲ့ သမီးကို ငဲ့ကြည့်ပေးပါ အဖေရယ်...
အမေပြုံးနေတာကိုပဲ မြင်ချင်တာပါ...ဖြစ်နိုင်မယ်ဆိုရင် အမေ့အနားမှာ နေပေးပါနော်...
အဖေနဲ့ ရင်ခုန်သံတွေ မတူတော့ဘူးဆိုရင်တောင်မှ
အဖေနဲ့တူတူ သက္ကရာဇ်တွေများစွာ အတားအဆီးတွေများစွာ
မျက်နှာတချက်မပျက်တမ်း ကြံကြံခံရင်ဆိုင်ရုန်းကန်ခဲ့တဲ့ အမေအတွက်
ဖြစ်နိုင်မယ်ဆိုရင် အမေ့အနားမှာ နေပေးပါနော်...
ဒါဟာ ပူဆာခြင်းဆိုလဲ ဟုတ်ပါတယ်...
တောင်းပန်ခြင်းလဲ မည်ပါတယ်...
မျှော်လင့်ခြင်းလို့လဲ ပြောလို့ရပါတယ်...
အဖေရယ်...အမေ့အနားမှာ နေပေးပါနော်...
အမေ့အနားမှာ...
Posted by Color Blind at 2:42 PM 3 comments
Labels: စိတ်ဖြေရာ, ကောက်ကြောင်း
Tuesday, August 21, 2007
ကိုမြင့်မိုးအောင်
ကျောင်းတွေ တက်နေရင်းနဲ့ ကိုယ့်ဘ၀လမ်းကို
ကိုယ်ကိုယ်တိုင် သံသယဖြစ်လာခဲ့တဲ့ အချိန်...
ဘယ်ကိုသွားမှာလဲ ဘာကိုလုပ်ရမှာလဲ
လုပ်ချင်တာကို လုပ်ရမှာလား လုပ်သင့်တာကို လုပ်ရမှာလား ဆိုတဲ့
အတွေးစတွေနဲ့ အကြီးအကျယ် နပန်းလုံးနေခဲ့ရတဲ့အချိန်...
လုပ်ချင်တာကို လုပ်ဖို့ အရည်အချင်း မပြည့်ဘူး
လုပ်သင့်တာကို လုပ်ဖို့ လုံလောက်တဲ့ စိတ်ဓါတ်အင်အားမရှိဘူး ဆိုပြီး
သိမ်ငယ်စိတ်တွေ အားငယ်စိတ်တွေနဲ့ လမ်းပျောက်နေတဲ့အချိန်...
အဲဒီလို အချိန်ကာလတခုမှာ ကိုမြင့်မိုးအောင်ရဲ့ အင်တာဗျူးတခုကို
အမှတ်မထင် ကံကောင်းထောက်မစွာနဲ့ ဖတ်လိုက်ရတယ်...
(မှတ်မိသလို ပြန်ရေးတာပါ)
သူဟာ အရာရာကို ငြီးငွေ့လွယ်သူပါ
မူးယစ်ဆေးဝါးကအစ ကိစ္စတော်တော်များများကို
ငြီးငွေ့တဲ့ ရှုထောင့်ကနေ ကြည့်တတ်ခဲ့ပါတယ်
အခုအချိန်ထိ မငြီးငွေ့နိုင်လောက်အောင်
သူ့ကို ဆွဲဆောင်ထားတဲ့ အရာနှစ်ခုက
ဂီတ နဲ့ ဘာသာတရား ပါ တဲ့...
ဒီဘ၀မှာရော နောင်ဖြစ်လေရာ ဘ၀မှာပါ
ဒီလမ်း ၂ခုကို ရောက်နိုင်သမျှ ဆက်လျှောက်သွားချင်သူပါ တဲ့...
ဒီစကားစုကို ဖတ်ပြီးအကြာကြီး ကိုယ့်ကိုယ်ကို ပြန်မေးမိတယ်...
ငါဟာ ဘာတွေကို ငြီးငွေ့ခဲ့ပြီလဲ...ဘာတွေက အသစ်ဖြစ်နေဆဲလဲ...
နောက်ဘ၀အထိအောင် ငါလုပ်ချင်နေမယ့် အရာက ဘာလဲ...
အဖြေရချင်တော့လဲ ဦးနှောက်ထဲ မီးသီးလင်းသွားသလို ဖြတ်ကနဲပဲ...
အိပ်မက်တွေကို ဇကာစစ်လိုက်တော့ ကျန်ရစ်တာ ဂီတ...
သူ့ရဲ့ စကားတခွန်းနဲ့ တသက်စာ ခွန်အားတွေ ဘ၀နေနည်းတွေ ရရှိခဲ့တယ်...
ကိုယ်ကိုယ်တိုင် ယုံကြည်ကျေနပ်တဲ့ အဖြေကို ရပြီးတဲ့နောက်
လွတ်လပ်တဲ့စိတ်နဲ့ အသက်ရှင်လို့ ရလာတယ်...
သူဟာ သီချင်းရေးဆရာ တယောက် ဖြစ်ပါတယ်...
ဒါပေမယ့် ကိုယ့်အတွက်တော့ ဆရာတဆူ ကျေးဇူးရှင်တယောက် အနေနဲ့ တည်ရှိပါတယ်...
Posted by Color Blind at 12:31 AM 0 comments
Labels: စိတ်အစာ, ကောက်ကြောင်း
Monday, July 23, 2007
ဒိုးလုံး
ဒိုးလုံး ဒိုးလုံး ဒိုးလုံး...
ဒီနေ့အထိ တောင်ကြီးမြို့ရဲ့ ဘယ်ရှိုးမှာမဆို ဘယ်သူပဲဆိုဆို
အခုချိန်အထိ ကြားနေရဆဲ ပရိသတ်တွေရဲ့အသံ...
အားလုံးအားလုံး သူ့ကိုချစ်ခင်မြတ်နိုးစွာနဲ့ မမေ့နိုင်ကြသေးဘူး...
အလွမ်းမပြေနိုင်ကြသေးဘူး...
သူ့သီချင်းတွေကို နားထောင်ရင်း သူနဲ့ အမှတ်တရတချို့ကို ပြန်သတိရမိတယ်...
ပထမဆုံး သူအခွေစထွက်တော့ (၁၉၉၇ ထင်တယ်)
အခွေကာဗာကို ကြည့်ပြီး ဘယ်လိုကြီးပါလိမ့်လို့ တွေးမိတယ်...
မြင်နေကြ ကာဗာတွေလိုမှ မဟုတ်ပဲ...
မိန်းမကြီးတယောက် ခွေခေါက်ပြီး ကနေလိုက်တာ...
အရိုးထိအောင်ရူး ဆိုတဲ့ album title နဲ့တော့ အံကိုက်ပါပဲ...
စစချင်း နားထောင်တော့ စာသားတွေကလဲ အဆန်းတွေ...
လက်မခံနိုင်ဘူး...ဒါပေမယ့်
ထပ်ပြီးနားထောင်ချင်လာအောင်တော့ ဆွဲဆောင်ထားသေးတယ်...
အဲလိုနဲ့ နားထဲ မ၀င့်တ၀င်အချိန်မှာ
ဒီဇင်ဘာ ခရစ်စမတ်ပွဲဆိုပြီး တိုင်းရင်းသားပေါင်းစုံ church မှာ
unplugged show လုပ်တယ်...
၁၀တန်းဆိုတော့ စာတွေကျက်ရတာ မောတယ်
စိတ်ပြေလက်ပျောက်လို့ အကြောင်းပြပြီး သွားကြည့်တာပေါ့
ဆိုတဲ့လူတွေလဲ တော်တော်များပါတယ်...
ဒိုးလုံးကတော့ နောက်ဆုံးပေါ့...
သူလဲတက်လာရော ဟာ...ဆိုပြီး ကြောင်ငေးသွားမိတယ်...
ဘ၀မှာ တခါမှ မမြင်ဖူးတဲ့ live performance ကို မြင်လိုက်ရတာ...
ထိုင်ခုံပေါ်မှာ ထိုင်ပြီး သီချင်းနဲ့အတူ စီးမျောနေတဲ့ပုံများ
သူရယ် သီချင်းရယ် အရာရာအားလုံးရယ် တသားထဲကျနေသလိုပဲ...
အဲဒီအချိန်ကစလို့ သူသီချင်းတွေရဲ့ အဖွဲ့အနွဲ့ အလှည့်အပြောင်း ဖန်တီးမှုတွေအောက်
သူ့အနုပညာကို အရမ်းကို ရူးသွပ်ခဲ့ပါတယ်...
တမြို့ထဲနေတော့ သူနဲ့ မကြာခဏ လမ်းမှာ ခလုတ်တိုက်မိတတ်တယ်...
မှတ်မှတ်ရရ မနက်ခင်း မြူခိုးတွေပိတ်နေပြီး အေးစက်နေတဲ့အချိန်
အိမ်နားက ဘုန်းကြီးကျောင်းလေးရဲ့ တံခါးဝရှေ့မှာ
ဂျာကင်အင်္ကျီထူကြီး နဲ့ လက်နှစ်ဖက်ထဲ လေနွေးနွေးလေးမှုတ်ထုတ်ပြီး
တစုံတရာကို မျှော်နေတဲ့ပုံမျိုးနဲ့ လာလာစောင့်နေတတ်တယ်...
လူငယ်လေးတယောက်ရဲ့ အချစ်ဇာတ်လမ်းလေး တပုဒ်ပေါ့...
ရန်ကုန်ကိုရောက်တော့ သူနဲ့ လူချင်းတွေ့တယ်ဆိုရုံလေး ဆုံဖြစ်တယ်...
စင်ပေါ်မှာ လူတွေကို ရူးသွပ်လောက်အောင် ဖမ်းစားနိုင်တဲ့ ဒိုးလုံးက
အပြင်လောကမှာတော့ သိပ်ရှက်တတ်တဲ့ လူအေးတယောက်ပါပဲ...
သူ့ရဲ့ တဖက်တည်း ၈ပေါက်လား မသိ
ဖောက်ထားတဲ့ နားပေါက်ကိုလဲ အငေးသားကြည့်မိတယ်...
စာရွက်ဆိုရင် ပြတ်ကျလောက်ပြီ ဆိုတဲ့အတွေးနဲ့ပေါ့...
သူမျှဝေဖူးတဲ့ အတွေးတခု...
သူ့အမေက သူ့ကိုပြောတဲ့စကားလို့ ပြောပါတယ်...
လူ့သက်တမ်းက အနှစ် ၆၀ ဆိုရင်
ဒီလောကကြီးမှာ အသက်ရှင်ခွင့်က ရက်ပေါင်း ၂၁ ၉၀၀ (တနှစ်မှာ ၃၆၅ရက်)
အဲဒီတုန်းက အသက် ၂၀ဆိုတော့ ရက်ပေါင်း ၇၃၀၀ နေခဲ့ပြီးပြီ...
ရက်ပေါင်း ၁၄၆၀၀ ပဲ ကျန်တယ်...
နေခွင့်ရတဲ့ အချိန်ဆိုတာ တိုတိုလေးရယ်...
ကိုယ်တန်တယ်ထင်တာကိုသာလုပ် တဲ့...
သူ့ရဲ့ အဲဒီစကားတခုကြောင့် ဒီနေ့ ဒီအချိန်အထိ
ချစ်တဲ့ဂီတနဲ့ ဆက်အသက်ရှင်ဖြစ်နေတယ်...
ဒါပေမယ့် ဒိုးလုံးရေ...
မင်း အသက် ၂၅နှစ်အထိ လုပ်ခဲ့တဲ့အလုပ်တွေကို
ငါ အသက် ၇၅နှစ်အထိ လုပ်ခွင့်ရရင်တောင် မမှီနိုင်ပါဘူး...
ဒီအတွက်ကြောင့် ဒီနေ့ ဒီအချိန်အထိ
ငါမင်းကို ချစ်ဆဲ...လေးစားဆဲ...မြတ်နိုးဆဲ...ကိုးကွယ်ဆဲ...
Posted by Color Blind at 9:28 AM 2 comments
Labels: ချစ်သော, ကောက်ကြောင်း
Subscribe to:
Posts (Atom)
